علی امین گنڈاپور کی مداخلت سے سلمان اکرم اور شیر افضل کے درمیان صلح
Blog post description.
وائرلخبریں
علی امین گنڈاپور کی مداخلت سے سلمان اکرم اور شیر افضل کے درمیان صلح
وزیر اعلیٰ خیبر پختونخوا علی امین گنڈاپور نے پاکستان تحریک انصاف کے سیکرٹری جنرل سلمان اکرم راجا اور رکن قومی اسمبلی شیر افضل مروت کے درمیان جاری تنازع کو ختم کراتے ہوئے دونوں رہنماؤں کے درمیان سیز فائر کرا دیا۔
پی ٹی آئی ذرائع کے مطابق وزیر اعلیٰ علی امین گنڈاپور نے دونوں رہنماؤں سے رابطہ کرتے ہوئے ان کے درمیان اختلافات ختم کرنے کی کوشش کی۔ انہوں نے دونوں رہنماؤں کو تحمل کا مظاہرہ کرنے کی تلقین کی اور کہا کہ میڈیا پر ایک دوسرے کے خلاف بیانات پارٹی کے لیے نقصان دہ ثابت ہوں گے۔
علی امین گنڈاپور نے واضح کیا کہ باہمی اختلافات اور میڈیا پر بیانات کا فائدہ صرف سیاسی مخالفین کو ہوگا۔ اس دوران شیر افضل مروت نے اپنے تحفظات سے وزیر اعلیٰ کو آگاہ کیا۔
ذرائع کے مطابق علی امین گنڈاپور کی مداخلت کے بعد دونوں رہنماؤں نے ایک دوسرے کے خلاف مزید بیانات نہ دینے کی یقین دہانی کرائی۔ شیر افضل مروت نے بھی وزیر اعلیٰ کے رابطے کی تصدیق کرتے ہوئے کہا کہ چند روز قبل علی امین گنڈاپور نے ان سے رابطہ کیا اور صلح کی اپیل کی۔
یاد رہے کہ چند روز قبل شیر افضل مروت اور سلمان اکرم راجا نے میڈیا پر ایک دوسرے کے خلاف سخت بیانات دیے تھے، جس پر تحریک انصاف کے چیئرمین عمران خان کی ہدایت پر پارٹی نے شیر افضل مروت کو شوکاز نوٹس جاری کیا تھا۔ تاہم، وزیر اعلیٰ کی کامیاب مداخلت کے بعد معاملہ حل کر لیا گیا ہے۔