آسٹریلیا سے بدترین شکست کے بعد بھارت ورلڈ ٹیسٹ چیمپئن شپ کے فائنل سے باہر

آسٹریلیا کے ہاتھوں بھارتی ٹیم کو بدترین شکست کا سامنا کرنا پڑا، جس کے نتیجے میں وہ ورلڈ ٹیسٹ چیمپئن شپ کے فائنل سے باہر ہو گئی۔ بھارت اور آسٹریلیا کے درمیان کھیلی گئی ٹیسٹ سیریز شائقین کے لیے دلچسپ اور سنسنی خیز رہی، جہاں میدان میں بھرپور ایکشن دیکھنے کو ملا۔ ویرات کوہلی اور سیم کونسٹن کے درمیان تلخ لمحے خاص طور پر توجہ کا مرکز بنے اور شائقین کے لیے دلچسپی کا باعث بنے۔

سڈنی میں کھیلے گئے آخری ٹیسٹ میچ میں بھارتی ٹیم کا غرور آسٹریلیا نے خاک میں ملا دیا۔ میزبان ٹیم نے بھارت کی جانب سے دیے گئے 162 رنز کے ہدف کو صرف 4 وکٹوں کے نقصان پر حاصل کر لیا۔ آسٹریلیا کے لیے عثمان خواجہ 41 رنز بنا کر نمایاں رہے، جبکہ بیو ویبسٹر نے 39 اور ٹریوس ہیڈ نے 34 رنز کی ناقابل شکست اننگز کھیلیں۔ بھارت کی طرف سے پراسدھ کرشنا نے 3 اور محمد سراج نے ایک وکٹ حاصل کی۔

یہ شکست بھارتی ٹیم کے لیے ایک بڑا دھچکا تھی، کیونکہ یہ ان کے لیے ورلڈ ٹیسٹ چیمپئن شپ کے فائنل میں پہنچنے کا آخری موقع تھا۔ مسلسل تیسری بار بھارتی ٹیم فائنل میں جگہ بنانے میں ناکام رہی۔ دوسری طرف، پیٹ کمنز کی قیادت میں آسٹریلیا نے شاندار کارکردگی کا مظاہرہ کرتے ہوئے 6 وکٹوں سے فتح حاصل کی اور فائنل میں اپنی جگہ یقینی بنائی۔

ورلڈ ٹیسٹ چیمپئن شپ کا فائنل 11 سے 15 جون 2025 کو لندن کے تاریخی لارڈز کرکٹ گراؤنڈ میں کھیلا جائے گا، جہاں آسٹریلیا کا مقابلہ جنوبی افریقہ سے ہوگا۔ یہ پہلا موقع ہوگا جب لارڈز اس ایونٹ کی میزبانی کرے گا۔

سیریز کے اختتام پر رینکنگ میں آسٹریلیا کے پوائنٹس 61.46 سے بڑھ کر 63.73 ہو گئے، جبکہ بھارت 52.78 پوائنٹس کے ساتھ تیسرے نمبر پر چلا گیا۔ اس شکست کے بعد بھارتی ٹیم ورلڈ ٹیسٹ چیمپئن شپ کے فائنل کھیلنے کے خواب سے محروم ہو گئی، جبکہ آسٹریلیا نے اپنی برتری ثابت کرتے ہوئے مسلسل دوسری بار فائنل میں رسائی حاصل کر لی۔