بمراہ انجرڈ: چیمپئنز ٹرافی میں شرکت سوالیہ نشان بن گئی

آسٹریلیا کے خلاف بارڈر گواسکر ٹرافی کے آخری ٹیسٹ میں انجری کی وجہ سے بولنگ نہ کرنے والے بھارتی فاسٹ باؤلر جسپریت بمراہ کی آئی سی سی چیمپئنز ٹرافی میں شرکت اب غیر یقینی ہو گئی ہے۔

آسٹریلیا کے حالیہ دورے کے دوران بمراہ کو کمر میں درد کا سامنا ہوا، جس کے نتیجے میں وہ سڈنی میں پانچویں ٹیسٹ کی دوسری اننگز میں بولنگ کرنے سے قاصر رہے تھے۔

بھارتی کرکٹ بورڈ کی جانب سے آئی سی سی چیمپئنز ٹرافی کے پیش نظر بمراہ کو انگلینڈ کے خلاف ہونے والی آئندہ وائٹ بال سیریز میں زیادہ آرام دینے پر غور کیا جا رہا ہے تاکہ وہ ٹورنامنٹ کے لیے مکمل طور پر فٹ ہو سکیں۔

بھارتی میڈیا کے مطابق، بمراہ کی انجری کی نوعیت ابھی تک واضح نہیں ہے، اور ان کی چیمپئنز ٹرافی میں شرکت کا فیصلہ ان کی صحت کی حالت پر منحصر ہوگا۔

بارڈر گواسکر ٹرافی کے دوران بمراہ نے 5 ٹیسٹ میچز میں 151.2 اوورز کرائے اور 32 وکٹوں کے ساتھ سب سے کامیاب بولر رہے۔

رپورٹس کے مطابق، اگر بمراہ کو گریڈ 1 کی انجری ہوئی تو ان کی ریکوری میں 2 سے 3 ہفتے لگ سکتے ہیں۔ گریڈ 2 کی انجری کی صورت میں 6 ہفتے تک ریکوری کا وقت درکار ہوگا، جبکہ گریڈ 3 کی انجری کی صورت میں انہیں 3 ماہ تک کرکٹ سے دور رہنا پڑ سکتا ہے۔

بھارت نے انگلینڈ کے خلاف 22 جنوری سے شروع ہونے والی 5 میچوں کی ٹی ٹوئنٹی سیریز اور اس کے بعد 3 ون ڈے میچز کھیلنے ہیں۔