چیمپئنز ٹرافی کے لیے پاکستانی اسکواڈ میں شامل ممکنہ کھلاڑیوں کے نام منظر عام پر

آئی سی سی چیمپئنز ٹرافی کے لیے پاکستانی اسکواڈ کو حتمی شکل دینے کے حوالے سے مشاورت جاری ہے، تاہم اوپنر صائم ایوب کی فٹنس پر ابھی بھی سوالیہ نشان موجود ہے۔ ذرائع کے مطابق، چیمپئنز ٹرافی 19 فروری سے شروع ہو رہی ہے، اور اس سے قبل پاکستان ٹیم نے ہوم گراؤنڈ پر جنوبی افریقا اور نیوزی لینڈ کے ساتھ سہ فریقی سیریز کھیلنی ہے۔

صائم ایوب کی فٹنس پر غیر یقینی صورتحال کے باعث ان سے متعلق کوئی حتمی فیصلہ نہیں کیا جا سکا۔ اگر ان کا فیصلہ ہو گیا تو سہ فریقی سیریز کی ٹیم ہی چیمپئنز ٹرافی کے لیے حتمی اسکواڈ بنے گی۔ اگر صائم ایوب فٹ نہ ہو سکے تو سلیکٹرز نے متبادل کھلاڑی کا انتخاب بھی کر لیا ہے۔

ذرائع کے مطابق چیمپئنز ٹرافی کے 15 رکنی اسکواڈ میں فخر زمان کی شمولیت یقینی ہے، جبکہ امام الحق اور حسیب اللہ کے ناموں پر غور جاری ہے۔ دوسری جانب، عبداللہ شفیق اور عثمان خان کے ڈراپ ہونے کا امکان ہے۔ اسکواڈ میں شامل دیگر کھلاڑیوں میں محمد رضوان، بابر اعظم، کامران غلام، سلمان علی آغا، طیب طاہر، عرفان خان، محمد حسنین، نسیم شاہ، شاہین آفریدی، حارث رؤف، ابرار احمد اور سفیان مقیم کے نام شامل ہیں۔

پاکستان نے ابھی تک آئی سی سی کو صرف ابتدائی اسکواڈ کے نام بھجوائے ہیں، جبکہ تمام دیگر ٹیمیں اپنے اسکواڈز کا اعلان کر چکی ہیں۔ پاکستان کو 11 فروری تک حتمی اسکواڈ کا اعلان کرنا ہوگا، اور سہ فریقی سیریز کا پہلا میچ 8 فروری کو کھیلا جائے گا۔