دھی رانی پروگرام: پہلے مرحلے میں 1500 مستحق جوڑوں کی شادی کا انعقاد

لاہور میں وزیر اعلیٰ پنجاب مریم نواز کے دھی رانی پروگرام کی سٹیرنگ کمیٹی کا چوتھا اجلاس ہوا، جس کی صدارت صوبائی وزیر سوشل ویلفیئر سہیل شوکت بٹ نے کی۔ اجلاس میں وزیر اعلیٰ کے پولیٹیکل ایڈوائزر ذیشان ملک، سیکرٹری سوشل ویلفیئر جاوید اختر، ڈی جی سوشل ویلفیئر سکندر ذیشان اور دیگر ممبران شریک ہوئے۔ ڈی جی سوشل ویلفیئر نے پروگرام کی تیاریوں پر بریفنگ دی، جس کے بعد کمیٹی نے لاہور کے 50 مستحق جوڑوں کی درخواستوں کی منظوری دی اور پہلے مرحلے میں اجتماعی شادیوں کے انعقاد کی حکمت عملی طے کی۔

پہلے مرحلے میں 1500 مستحق جوڑوں کی شادی کا اہتمام کیا جائے گا، جس کا آغاز لاہور سے ہوگا۔ نوبیاہتا جوڑوں کو 1 لاکھ روپے سلامی اے ٹی ایم کارڈ کے ذریعے دی جائے گی، جبکہ یتیم، بے سہارا اور معذور افراد کی بیٹیوں کو خصوصی ترجیح دی جائے گی۔ شادی شدہ جوڑوں کو روزمرہ استعمال کی اشیاء بطور تحفہ دی جائیں گی۔ حکومت پنجاب اس پروگرام پر 1ارب روپے خرچ کر رہی ہے، اور اس کے تحت محکمہ سوشل ویلفیئر اور پنجاب بینک کے درمیان سروس لیول ایگریمنٹ پر دستخط کیے گئے ہیں۔ یہ پروگرام مستحق خاندانوں کے لیے ایک انقلابی اقدام ہے، جو نہ صرف ان کی مالی مدد کرے گا بلکہ ان کے مستقبل کو بھی سہارا دے گا۔