انگلینڈ کرکٹ بورڈ نے چیمپئنز ٹرافی میں افغانستان کے خلاف میچ کا بائیکاٹ کرنے کے مطالبے کو مسترد کر دیا

انگلینڈ کے سیاستدانوں نے طالبان حکومت کی جانب سے افغان خواتین پر پابندیوں کے سبب چیمپئنز ٹرافی 2025 میں افغانستان کے خلاف میچ کے بائیکاٹ کا مطالبہ کیا تھا، تاہم انگلش کرکٹ بورڈ (ای سی بی) نے اس مطالبے کو مسترد کردیا ہے۔

کھیلوں کی ویب سائٹ ’کرک انفو‘ کی رپورٹ کے مطابق، ای سی بی کے چیف ایگزیکٹو رچرڈ گولڈ نے برطانوی سیاست دانوں کے گروپ کی جانب سے 2025 کی آئی سی سی چیمپئنز ٹرافی میں افغانستان کے خلاف میچ کا بائیکاٹ کرنے کے مطالبے کو مسترد کردیا۔

رچرڈ گولڈ کا کہنا تھا کہ طالبان حکومت کی جانب سے خواتین پر پابندیاں لگانے اور ان کے حقوق کو نظر انداز کرنے کے معاملے پر کسی ایک ملک کی طرف سے کارروائی کے بجائے، عالمی کرکٹ کی گورننگ باڈی، آئی سی سی کی قیادت میں ایک مشترکہ ردعمل کی ضرورت ہے۔

چیمپئنز ٹرافی میں انگلینڈ اور افغانستان کے درمیان میچ 26 فروری کو لاہور میں شیڈول ہے۔

انگلش کرکٹ بورڈ پر انگلینڈ کی لیبر پارٹی کی رکن پارلیمنٹ کی جانب سے ایک خط کا دباؤ تھا، جس پر 160 سے زائد سیاست دانوں نے دستخط کیے تھے۔ اس خط میں افغانستان میں خواتین کے ساتھ امتیازی سلوک پر تشویش کا اظہار کیا گیا تھا، اور مطالبہ کیا گیا تھا کہ انگلینڈ کی کرکٹ ٹیم طالبان کے دور میں افغان خواتین کے حقوق کے تحفظ کے لیے آواز اٹھائے۔

رچرڈ گولڈ نے اپنے جواب میں کہا کہ ای سی بی کا افغانستان کے ساتھ کوئی دو طرفہ سیریز کھیلنے کا ارادہ نہیں، مگر آئی سی سی ایونٹس میں ان کی شرکت ایک مجموعی فیصلہ ہے۔ انہوں نے کہا کہ ای سی بی طالبان کے دور حکومت میں افغانستان میں خواتین اور لڑکیوں کے ساتھ ہونے والے سلوک کی شدید مذمت کرتا ہے، اور عالمی سطح پر اس مسئلے کے حل کے لیے تعمیری بات چیت جاری رکھے گا۔