گورنر سٹیٹ بینک کی پیش گوئی: رواں مالی سال میں مہنگائی سنگل ڈیجیٹ میں رہے گی

گورنر سٹیٹ بینک جمیل احمد کا کہنا ہے کہ رواں مالی سال کی آخری سہ ماہی تک مہنگائی میں استحکام آئے گا اور یہ سنگل ڈیجیٹ میں رہنے کی توقع ہے۔

اسلام آباد میں سینیٹ قائمہ کمیٹی خزانہ کے اجلاس کے دوران، جس کی صدارت سینیٹر سلیم مانڈوی والا نے کی، گورنر سٹیٹ بینک نے معاشی صورتحال پر تفصیل سے بریفنگ دی۔ انہوں نے بتایا کہ مانیٹری پالیسی کمیٹی نے مہنگائی پر قابو پانے کے لیے سخت اقدامات کیے ہیں، اور مئی 2023 تک مہنگائی 38 فیصد تک پہنچ گئی تھی۔ اسی دوران، جون 2022 میں شرح سود 22 فیصد تک پہنچ گئی تھی، مگر مہنگائی میں کمی آنے کے بعد سود کی شرح کم کی گئی۔

گورنر سٹیٹ بینک نے کہا کہ میڈیم ٹرم میں مہنگائی کا ہدف 5 سے 7 فیصد رکھا گیا ہے، تاہم انہوں نے یہ بھی وضاحت کی کہ مالی سال کی آخری سہ ماہی میں کچھ اتار چڑھاؤ ممکن ہے، اور آئندہ مالی سال کی پہلی سہ ماہی میں بھی رسک کی صورتحال برقرار رہ سکتی ہے۔

اس پر سینیٹر سلیم مانڈوی والا نے کہا کہ مہنگائی کی موجودہ شرح کے مطابق 13 فیصد شرح سود بہت زیادہ ہے، جس پر گورنر جمیل احمد نے جواب دیا کہ پچھلے تین سالوں میں مہنگائی تاریخ کی بلند ترین سطح پر رہی تھی اور سٹیٹ بینک نے اس پر قابو پانے کے لیے متعدد اقدامات کیے تھے۔

جمیل احمد نے مزید کہا کہ باوجود مشکلات کے، مہنگائی میں نمایاں کمی کی گئی ہے، اور رواں مالی سال کے اختتام تک اس میں مزید استحکام آئے گا۔