گزشتہ سال کے حاجیوں کو 40 ہزار روپے واپس کیے جائیں گے: چوہدری سالک حسین

گزشتہ سال کے حاجیوں کو 40 ہزار روپے واپس کیے جائیں گے: چوہدری سالک حسین

وفاقی وزیر مذہبی امور چوہدری سالک حسین نے اعلان کیا ہے کہ گزشتہ سال فریضہ حج ادا کرنے والے عازمین کو 40 ہزار روپے تک واپس کیے جائیں گے۔ انہوں نے ایک نجی ٹی وی چینل سے بات کرتے ہوئے وضاحت کی کہ رقوم کی واپسی کیٹگری کے حساب سے ہوگی اور ہر حاجی کو اندازاً یہ رقم واپس ملے گی۔

وفاقی وزیر نے مزید بتایا کہ اس سال حج کے دوران عازمین کو پرانی قیمتوں میں اضافی سہولتیں فراہم کی جائیں گی۔ اس سال حاجیوں کو تین وقت کا کھانا دیا جائے گا، جبکہ منیٰ میں قیام کے لیے پہلے سے بہتر انتظامات کیے گئے ہیں۔ گزشتہ برس روم کولرز کا انتظام تھا، لیکن اس سال عازمین کو ایئرکنڈیشنڈ سہولت فراہم کی جائے گی۔ اسی طرح، گزشتہ سال کے کپڑے کے خیموں کی جگہ اس سال جپسم کے بنے خیمے دیے جائیں گے۔

انہوں نے کہا کہ سب سے بڑی سہولت "روڈ ٹو مکہ" پروجیکٹ ہوگی، جس کے تحت عازمین کی امیگریشن پاکستان میں ہی مکمل کی جائے گی اور ان کا سامان براہِ راست سعودی ہوٹل میں پہنچایا جائے گا۔ ان سہولتوں سے عازمین کو زیادہ آرام دہ اور آسان حج کا تجربہ ہوگا۔

چوہدری سالک حسین نے مزید یقین دہانی کرائی کہ حکومت اس سال حج کو زیادہ سے زیادہ سہولت بخش بنانے کے لیے بھرپور کوششیں کر رہی ہے۔