عمران خان کی رہائی یا ہاؤس اریسٹ پر حکومت سے کوئی بات نہیں ہوئی: بیرسٹر گوہر

چیئرمین پی ٹی آئی کے وکیل بیرسٹر گوہر نے ان خبروں کی تردید کی ہے جن میں دعویٰ کیا گیا تھا کہ حکومت نے بانی پی ٹی آئی عمران خان کو رہائی، ہاؤس اریسٹ، یا منتقلی کی پیشکش کی تھی۔

جیو نیوز سے گفتگو میں بیرسٹر گوہر نے واضح کیا کہ حکومت سے 26 نومبر سے پہلے رابطہ ضرور ہوا تھا لیکن کسی قسم کے مذاکرات یا ڈیل کی بات نہیں ہوئی۔ ان کا کہنا تھا کہ محسن نقوی کے ذریعے مذاکرات یا عمران خان کی بنی گالہ منتقلی کی پیشکش سے متعلق کوئی بات چیت نہیں ہوئی۔

اس سے قبل، پی ٹی آئی کے رہنما شیر افضل مروت نے ایک انٹرویو میں دعویٰ کیا تھا کہ حکومت اور اسٹیبلشمنٹ کی جانب سے محسن نقوی نے عمران خان کو ہاؤس اریسٹ کی پیشکش کی تھی۔ ان کے مطابق، اس پیشکش سے انکار پر 20 دسمبر تک رہائی کی بات بھی ہوئی، لیکن 26 نومبر کے واقعے کے بعد حالات بدل گئے اور سیاسی قیادت سے مذاکرات شروع ہوئے۔

شیر افضل مروت نے یہ بھی کہا کہ اگر محسن نقوی کو حکومتی مذاکراتی ٹیم میں شامل کیا جاتا تو ممکن ہے کہ پی ٹی آئی قیادت کو بانی پی ٹی آئی سے ملاقات کا موقع مل چکا ہوتا، کیونکہ محسن نقوی مذاکرات میں لچک دکھانے کے لیے جانے جاتے ہیں۔