عمران خان سے ملاقات کے بغیر حکومت سے مذاکرات کی تیسری نشست مفید نہیں: حامد رضا

عمران خان سے ملاقات کے بغیر حکومت سے مذاکرات کی تیسری نشست مفید نہیں: حامد رضا

تحریک انصاف کی مذاکراتی کمیٹی کے ترجمان صاحبزادہ حامد رضا نے کہا ہے کہ اگر عمران خان سے ملاقات کے بغیر حکومت کے ساتھ تیسری مذاکراتی نشست ہوئی، اور 9 مئی اور 26 نومبر کے واقعات پر جوڈیشل کمیشن نہ بنایا گیا تو شاید چوتھی مذاکراتی نشست کا انعقاد نہ ہو۔

حامد رضا نے جیو نیوز کے پروگرام "آج شاہ زیب خانزادہ کے ساتھ" میں گفتگو کرتے ہوئے کہا کہ منگل کی رات تک مذاکرات میں ڈیڈلاک کا اعلان کیا گیا تھا، لیکن بدھ کو پی ٹی آئی کے بانی کی طرف سے پیغام آیا کہ حکومتی کمیٹی کو دو مطالبات لکھ کر دیے جائیں گے، جو وہ فراہم کریں گے۔

انہوں نے مزید کہا کہ حکومت عمران خان سے ملاقات کرانے کا وعدہ پورا نہیں کر سکی، اور اب حکومت کو یہ واضح طور پر لکھ کر دینا چاہیے کہ اس کے کوئی مطالبات نہیں ہیں۔

حامد رضا نے کہا کہ اگر تیسری نشست میں جوڈیشل کمیشن کے مطالبے کو پورا کیا جاتا ہے، تو ان کا دوسرا مطالبہ پورا ہونے کے لیے 10 سے 12 دن باقی رہ جائیں گے۔ ان کا کہنا تھا کہ وہ کمیٹیوں کے کھیل میں نہیں پڑنا چاہتے اور عملی اقدامات کی طرف پیش قدمی کرنا چاہتے ہیں۔

انہوں نے یہ بھی کہا کہ اگر مذاکرات کے دوران کوئی مفاہمت یا گفتگو سے اجتناب کرنا ہے تو دونوں فریقوں کو اس کا فیصلہ خود کرنا ہوگا۔

حامد رضا نے یہ بھی کہا کہ بگنگ ڈیوائسز لگا کر سننے والے لوگ شاید نہیں چاہتے کہ عمران خان سے ملاقات ہو، تاہم وہ یہ صاف طور پر بیان کر رہے ہیں کہ اگر مذاکرات ناکام بھی ہو جاتے ہیں، تو پی ٹی آئی کے بانی قانونی جنگ لڑ کر باہر آئیں گے۔