خواتین کو شوہر یا والدین کی اجازت کے بغیر حج پر جانے کی اجازت نہیں، وزارت مذہبی امور کا اعلان

وزارت مذہبی امور نے وضاحت کی ہے کہ خواتین اپنے شوہروں یا والدین کی اجازت کے بغیر حج پر جانے کے لیے نہیں جا سکتیں۔

وزارت کے مطابق، سعودی حکومت نے پاکستان کو اس سال مجموعی طور پر ایک لاکھ 79 ہزار 210 عازمین حج کا کوٹہ دیا ہے۔ ان میں سے تقریباً 89 ہزار 602 افراد سرکاری اسکیم کے تحت حج کریں گے، جبکہ باقی افراد نجی ٹور آپریٹرز کے ذریعے حج کے سفر پر روانہ ہوں گے۔

2025 کی حج پالیسی کے مطابق، اسلامی نظریاتی کونسل (سی آئی آئی) کی جانب سے مقرر کردہ شرائط کے تحت خواتین کو اکیلے حج کے لیے سعودی عرب جانے کی اجازت دی جا سکتی ہے۔

دستاویز میں کہا گیا ہے کہ اسلامی نظریاتی کونسل کے 6 اور 7 جون 2023 کے اجلاس میں کیے گئے فیصلوں کے مطابق، خاتون (بغیر محرم) کو ان شرائط کے ساتھ حج کی اجازت دی جائے گی کہ اسے اس کے والدین یا شوہر کی اجازت حاصل ہو، اور وہ قابل اعتماد خواتین کے گروپ کے ساتھ سفر کرے، اس کی عزت کو کوئی خطرہ نہ ہو۔

ماضی میں پاکستانی خواتین حج کے لیے اکیلے سعودی عرب نہیں جا سکتی تھیں، تاہم 2021 میں سعودی حکومت نے خواتین کو حج اور عمرہ کے لیے اکیلے سفر کرنے کی اجازت دے دی تھی، اور اس فیصلے کو سعودی حکومت کی خواتین کے حقوق میں بہتری کے اقدامات کے حصے کے طور پر بیان کیا گیا تھا۔

دستاویز میں یہ بھی بتایا گیا کہ 12 سال سے کم عمر بچے حج کے سفر پر نہیں جا سکتے، اور سعودی عرب کی منظور شدہ ویکسین حجاج کے لیے لازمی ہو گی۔