نیشنل ہائی وے اتھارٹی کی جانب سے ٹول ٹیکس میں اضافہ

حکومت نے ہائی ویز اور موٹر ویز پر سفر کرنے والوں کو نئے سال کا تحفہ دیتے ہوئے ٹول ٹیکس میں اضافہ کر دیا ہے۔ نیشنل ہائی وے اتھارٹی نے اس اضافے کا نوٹیفکیشن جاری کیا ہے، جو 5 جنوری سے مؤثر ہوگا۔ نوٹیفکیشن کے مطابق، قومی شاہراہوں پر موٹر کار کا ٹول ٹیکس 60 روپے، ویگن کا 100 روپے اور بسوں کا 200 روپے مقرر کیا گیا ہے۔

اس کے علاوہ، 2 اور 3 ایکسل والے ٹرکوں سے 250 روپے اور بڑے ٹرکوں سے 500 روپے ٹول ٹیکس وصول کیا جائے گا۔ نیشنل ہائی وے اتھارٹی نے ایم 1، ایم 3، ایم 4، ایم 5، ایم 14 اور ای 35 موٹر ویز پر بھی ٹول ٹیکس میں اضافہ کیا ہے۔ اسلام آباد سے پشاور جانے والی ایم ون موٹروے پر کار کے لیے ٹول ٹیکس 460 روپے سے بڑھا کر 500 روپے کر دیا گیا ہے۔ لاہور سے عبدالحکیم جانے والی ایم تھری پر کار کے ٹول ٹیکس میں 50 روپے کا اضافہ کیا گیا ہے، جس کے بعد یہ 650 روپے سے بڑھ کر 700 روپے ہو گیا ہے۔

پنڈی بھٹیاں سے فیصل آباد اور ملتان جانے والی ایم فور پر کار کے لیے ٹول ٹیکس 950 روپے کر دیا گیا ہے، جو کہ پہلے 850 روپے تھا۔ ملتان سے سکھر جانے والی ایم فائیو پر کار کا ٹول ٹیکس 1050 روپے سے بڑھا کر 1100 روپے کر دیا گیا ہے۔ اسی طرح، ڈی جی خان سے ہکلہ جانے والی ایم 14 پر ٹول ٹیکس 600 روپے کر دیا گیا ہے، جبکہ حسن ابدال، حویلیاں اور مانسہرہ کی ای 35 پر 250 روپے ٹول ٹیکس وصول کیا جائے گا۔

بڑی گاڑیوں کے لیے ایم 1، ایم 3، ایم 4، ایم 5، ایم 14 اور ای 35 پر ٹول ٹیکس 750 روپے سے بڑھا کر 5550 روپے کر دیا گیا ہے۔