روہت شرما کی پاکستان آمد کا فیصلہ تاحال معطل، کپتانوں کا ایونٹ کراچی میں متوقع

روہت شرما کی پاکستان آمد کا فیصلہ تاحال معطل، کپتانوں کا ایونٹ کراچی میں متوقع

بھارتی کرکٹ ٹیم کے کپتان روہت شرما کے پاکستان آنے یا نہ آنے کا فیصلہ ابھی تک واضح نہیں ہو سکا ہے۔ کپتانوں کا یہ ایونٹ، جو ممکنہ طور پر 16 یا 17 فروری کو کراچی میں ہوگا، چیمپئنز ٹرافی کے لیے ایک اہم تقریب ہے، لیکن اس حوالے سے بھارتی کرکٹ بورڈ کی جانب سے کوئی وضاحت نہیں دی گئی۔

بھارتی کرکٹ بورڈ کے سیکرٹری دیوجیت سائیکیا کا کہنا ہے کہ روہت شرما کے پاکستان جانے کے حوالے سے تاحال کوئی بات چیت نہیں ہوئی اور یہ معاملہ ابھی بورڈ کے ایجنڈے پر نہیں آیا۔

اس بات کی بھی تصدیق نہیں ہو سکی کہ روہت شرما کو پاکستان آنے کے لیے بھارتی حکومت کی اجازت درکار ہوگی یا نہیں۔ دوسری جانب پاکستان کرکٹ بورڈ (پی سی بی) پہلے ہی انٹرنیشنل کرکٹ کونسل (آئی سی سی) کو زور دے کر کہہ چکا ہے کہ تمام معاملات پالیسی اور روایت کے مطابق ہونے چاہئیں۔

چیمپئنز ٹرافی کے نئے پرومو میں پاکستانی اور بھارتی کھلاڑیوں کو ایک ساتھ دکھایا گیا ہے، جبکہ بھارتی ٹیم کی شرٹ پر پاکستان کا نام لکھنے کا معاملہ بھی حل ہو چکا ہے۔ بھارتی بورڈ پہلے ہی کہہ چکا ہے کہ آئی سی سی کے قوانین پر مکمل عمل درآمد کیا جائے گا۔

واضح رہے کہ گزشتہ سال ٹی ٹوئنٹی ورلڈ کپ 2024 سے پہلے کپتانوں کی پریس کانفرنس منعقد نہیں ہو سکی تھی کیونکہ ٹیمیں ویسٹ انڈیز اور امریکا میں وارم اپ میچز کھیلنے میں مصروف تھیں۔ کپتانوں کا یہ ایونٹ اس بار کرکٹ شائقین کے لیے خاص اہمیت رکھتا ہے، تاہم روہت شرما کی شرکت ایک بڑا سوالیہ نشان بنی ہوئی ہے۔