کرکٹ میں سال 2025 کی پہلی ہیٹ ٹرک سری لنکن بولر کے نام
کھیل
کرکٹ میں سال 2025 کی پہلی ہیٹ ٹرک سری لنکن بولر کے نام
سری لنکن آف اسپنر مہیش ٹھیکشانا نے نیوزی لینڈ کے خلاف دوسرے ون ڈے میں شاندار کارکردگی کا مظاہرہ کرتے ہوئے سال 2025 کی پہلی ہیٹ ٹرک کا اعزاز اپنے نام کرلیا۔ وہ نیوزی لینڈ کی سرزمین پر ہیٹ ٹرک کرنے والے پہلے سری لنکن بولر بن گئے اور ون ڈے کرکٹ میں سری لنکا کے ساتویں ہیٹ ٹرک کرنے والے بولر کا اعزاز بھی حاصل کیا۔
نیوزی لینڈ کے دورے پر موجود سری لنکن ٹیم نے بدھ کو 3 میچوں کی سیریز کا دوسرا ون ڈے کھیلا۔ بارش سے متاثرہ اس میچ کو 37 اوورز فی اننگز تک محدود کیا گیا۔ نیوزی لینڈ نے پہلے بیٹنگ کرتے ہوئے 9 وکٹوں پر 255 رنز بنائے، جہاں رچن رویندرا نے 79 اور مارک چیپمین نے 62 رنز کی شاندار اننگز کھیلی۔
مہیش ٹھیکشانا نے 8 اوورز میں 44 رنز دے کر 4 وکٹیں حاصل کیں، جن میں ان کی یادگار ہیٹ ٹرک بھی شامل تھی۔ انہوں نے 35ویں اوور کی آخری دو گیندوں پر مچل سینٹنر اور ناتھن اسمتھ کو آؤٹ کیا، اور پھر 37ویں اوور کی پہلی گیند پر میٹ ہنری کو پویلین بھیج کر ہیٹ ٹرک مکمل کی۔
256 رنز کے ہدف کے تعاقب میں سری لنکن ٹیم کی بیٹنگ ناکام رہی اور وہ 31ویں اوور میں 142 رنز پر ڈھیر ہوگئی۔ اس فتح کے ساتھ نیوزی لینڈ نے سیریز میں 0-2 کی فیصلہ کن برتری حاصل کرلی۔
سیریز کا تیسرا اور آخری میچ 11 جنوری کو آکلینڈ میں کھیلا جائے گا۔